நலம் பெற வாழ்த்திய நெஞ்சங்களுக்கு நன்றி!

கடந்த 27 ஆம் தேதி, நெய்வேலியிலிருந்து குறிஞ்சிப்பாடிக் கூட்டத்திற்குப் புறப்பட்டுக் கொண்டிருந்த வேளையில்,  நெஞ்சு வலியால் துன்பப்பட்டு மருத்துவ மனையில் சேர்க்கப்பட்டேன். பிறகு ஆம்புலன்சில் சென்னைக்குக் கொண்டுவரப்பட்டு MMM மருத்துவ மனையில் அனுமதிக்கப் பட்டேன். அச்சப்பட ஒன்றுமில்லை என்றும், முழு ஓய்வு தேவை என்றும் மருத்துவர்கள் கூறி வீட்டிற்கு அனுப்பி விட்டனர். ஒரு வாரம் முழுமையாக ஓய்வு எடுத்தபின் இப்போது முழு நலத்துடன் உள்ளேன்.

             

இன்று (06.04.2013) காலை தலைவர் கலைஞரைச் சந்தித்து வாழ்த்துகளைப் பெற்று வந்தேன்.

நெய்வேலியில் அருகிருந்து என்னைக் கவனித்துக் கொண்ட தோழர்கள் முரளி, முத்துமோகன் உள்ளிட்ட பேரவை நண்பர்களுக்கும் , மிகுந்த அன்புடன் உதவிகள் செய்த மேனாள் அமைச்சர் எம்.ஆர்.கே. பன்னீர்ச்செல்வம் அவர்களுக்கும், நெய்வேலி தி.மு.கழக நண்பர்களுக்கும் என் நெஞ்சம் நிறைந்த நன்றி.

நாளெல்லாம் ஓடி ஓடி உழைத்துக் கொண்டிருக்கும் தளபதி மு.க. ஸ்டாலின் தன் பல்வேறு பணிகளுக்கிடையில் வீட்டிற்கு வந்து என்னைச்  சந்தித்தது மறக்க முடியாத நினைவாகும். நேரிலும். தொலைபேசி மூலமும் ஆறுதலும் ஊக்கமும் அளித்த அனைவருக்கும் என் அன்பும், நன்றியும்!  

எப்போதும் என்னிடம் அன்பு காட்டி என்னைப் பாதுகாக்கும் என் மனைவி, பிள்ளைகள், குடும்பத்தினர் அனைவரையும் நெகிழ்வோடு எண்ணிப் பார்க்கின்றேன். ஏறத்தாழ ஒருவாரம், என்னை முழு ஓய்வில் தங்கள் வீட்டில் வைத்திருந்த செல்வ அண்ணன் - அண்ணியின் அன்பு பெரியது.

இனிமேல் வாரம் இரண்டு கூட்டங்கள் மட்டுமே பேசுங்கள் என்ற மருத்துவர் அறிவுரைப்படி, கூட்டங்களின் எண்ணிக்கையைக் குறைத்துள்ளேன். வரும் 9ஆம் தேதி சென்னை, சாலிக்ராமம் அருகில் உள்ள தசரதபுரத்தில் முதல் கூட்டம். 

தொடரும் நம் பயணம்!