அரசியல் பண்பாடு!

       பாட்டாளி மக்கள் கட்சியின் நிறுவனர் மருத்துவர் ராமதாஸ் அவர்களின் இல்லத் திருமணம் அண்மையில் மாமல்லபுரத்தில் நடைபெற்றது அத் திருமணத்திற்குக் கட்சி வேறுபாடுகள் பார்க்காமல் அனைவருக்கும் அழைப்பு அனுப்பப் பட்டது என்று கூறப்பட்டது. பெரிய மகிழ்ச்சிதான். பண்பாட்டு விழாக்களிலேனும் இப்படி நாம் அனைவரும் நடந்து கொள்ள வேண்டும் என்பது பலரின் விருப்பமாக உள்ளது. தில்லி அரசியலில் ஏற்கனவே இத்தகு நிலை உள்ளது.

       திருமண விழாவில் தலைவர் கலைஞர், தளபதி ஸ்டாலின், வைகோ, ஜி. ராமகிருஷ்ணன் உள்ளிட்ட தலைவர்கள் பலர் நேரில் சென்று கலந்து கொண்டனர்.  நடிகர் சோ வீட்டுத் திருமணத்தில் கூட நேரில் சென்று கலந்து கொண்டவர் தலைவர் கலைஞர். அதனால் இது மிக இயல்பானதாகவே என் போன்றவர்களுக்குத் தோன்றியது.

       திருமணம் முடிந்த மறுநாள், ஒரு தகவல் கிடைத்தது. எல்லோருக்கும் அழைப்பு அனுப்பப்படவில்லை என்பதுதான் அது. எனக்கு வியப்பாக இருந்தது. எனக்கும் கூட அழைப்பு, அக்கட்சியின் மாவட்டச் செயலாளர் ஒருவர் மூலம் நேரில் கொண்டு வந்து கொடுக்கப் பட்டது. நேரில் செல்ல முடியாத நிலையில், வாழ்த்துச் செய்தி மட்டும் அனுப்பியிருந்தேன். அப்படியிருக்க, வேறு யாருக்கு அழைப்பு இல்லை என்று கேட்டேன்.

       நண்பர் தொல். திருமாவளவனுக்கு அழைப்பு இல்லை என்று கூறினர். சிறுத்தைகளிடம் கேட்டு  உறுதிப் படுத்திக் கொண்டேன்.

      அவர்கள் வீட்டுத் திருமணத்திற்கு யார் யாரை அழைக்கலாம் என்று முடிவு செய்வது அவர்கள் உரிமை. அதில் நாம் தலையிடுவது நாகரிகமன்று. ஆனாலும் ஒடுக்கப்பட்ட மக்களின் தலைவரைப் புறக்கணிப்பது எந்தவிதமான அரசியல் பண்பாடு என்னும் ஒரு கேள்வி என்னுள் ஓடிக் கொண்டே இருக்கிறது.

     பார்ப்பனர் அல்லாதார் இயக்கம் அன்று தொடங்கியது. தலித் அல்லாதார் இயக்கம் இன்றில்லை, என்றும் தொடங்கப்படக் கூடாத ஒன்று.