பாராட்டும் கண்டனமும்!

எடப்பாடி தலைமையிலான தமிழக அரசு ஓர் உருப்படியான செயலைச் செய்துள்ளது. அமெரிக்க ஹார்வர்ட் பல்கலைக்கழகத்தில் தமிழ் இருக்கை உருவாக்குவதற்கான முயற்சிகள் நடைபெற்று வருவதை அறிவோம். அதற்கு 31 கோடி ரூபாய் அந்தப் பல்கலைக்கழகத்திற்குக் கொடுக்க வேண்டும். அந்த முயற்சியில் தனியார் சிலரும், இந்து நாளேடும் ஈடுபட்டிருந்தனர். இப்போது தமிழக அரசு அதற்கு 10 கோடி ரூபாயை ஒதுக்கியுள்ளது. தமிழக அரசின் இச்செயலை மனமுவந்து பாராட்டுகின்றோம்!

பாஜக மாநிலத்து தலைவர் தமிழிசை குறித்துக் கேலி செய்தும், அவர் தோற்றத்தை நையாண்டி செய்தும் சமூக வலைத் தளங்களில் எழுதப்பட்டுவரும் கேலிப்படங்கள் தவறானவை. யாரொருவரின் அரசியலையும் நாம் விமர்சிக்கலாம். ஆனால் தனிப்பட்டமுறையில் அவர் உருவத்தையும், உடல் நிறத்தையும், தலைமுடியையும் கேலி செய்வது கண்டனத்திற்குரியது.