ஒரு நிமிடச் செய்திகள்

தோழர் சுப. வீரபாண்டியன், கட்செவிப் புல (வாட்ஸ் அப்) ஊடகத்தில், ஒவ்வொரு நாள் காலையிலும் ஒரு நிமிடத்தில் ஒரு செய்தியைக் கூறி வருகின்றார். அவற்றிலிருந்து சில  செய்திகள் கீழே தரப்பட்டுள்ளன).

                                            ஓணமும் தீபாவளியும் 

                                           

 ஓணம், தீபாவளி ஆகிய இரண்டு விழாக்களுக்கும் பின்புலமாகச் சொல்லப்படும் கதைகள் ஒரே மாதிரியாக இருக்கின்றன. இரண்டுமே புராணக் கதைகள் என்பதால், இரண்டிலும் அறிவியலுக்கு முரணான கூறுகள் இருக்கின்றன. ஆனாலும், இரு விழாக்களின் நோக்கங்களிலும் பெரிய வேறுபாடு உள்ளது.

ஒருவனின் மரணத்தைக் கொண்டாடுகிறது தீபாவளி. மாவலி மன்னர் மறுபடியும் வரவேண்டும் என்ற நோக்கில், வருகிறார் என்று நம்பிக்கையைக் கொண்டாடுகிறது ஓணம். வென்றவன் பக்கத்துப் பெருமையை மட்டும் பேசுகிறது தீபாவளி. வீழ்ந்தவன் பக்கத்து நியாயத்தையும் முன்வைக்கிறது ஓணம்.

        "மாவேலி மன்னர் வானிடும் காலம் 

         மானுஷர் எல்லாம் ஒன்னு போலே"

என்று ஒலிக்கிறது ஒரு மலையாள நாட்டுப்புறப் பாடல். அனைத்து மனிதர்களையும் சமமாக நடத்திய மாவலி மன்னரைக் கொன்றது என்ன நியாயம் என்னும் சினமும் அப்பாடலில் பொதிந்து கிடக்கிறது.

 ஓணம் உரிமைக்குக் குரல் கொடுக்கிறது. தீபாவளி, அடிமைத்தனத்தை உறுதிப்படுத்துகிறது.

                                         மனுநீதிச் சோழன் 

                                         

 நீதி தவறாதவர்களை மனு நீதிச் சோழன் என்று கூறுவதை இன்றும் கேட்கிறோம். மூன்றாம் குலோத்துங்கன் காலத்தில்தான் அந்தக் கதை நடைபெற்றதாகக் கூறப்படுகிறது. 

திருவாரூர் நகரில் இளவரசன் உலா வந்தபோது, அவனது தேர்க்காலில் சிக்கி ஒரு பசுங்  கன்று இறந்துவிட்டதாகவும், தாய்ப்பசு ஆராய்ச்சி மணி அடித்து நீதி கேட்டதாகவும் கூறும் அக்கதை,இளவரசனையே  தேர்க் காலில் இட்டு மன்னன் கொன்று நீதி வழங்கியதாகக் கூறுகிறது.

அங்கே நடந்தது விபத்துதான், கொலையன்று. அதற்காக ஓர் இளவரசனைக் கொன்றது நீதியன்று, அநீதி.  ஆனால் அக்கதை இன்றளவும் ஏன் போற்றப்படுகிறது?  மனிதர்களை விட பசுக்கள் உயர்வானவை என்பதையும், பசு வதை கூடாது என்பதையும் நிலை நிறுத்துவதற்காகப் புனையப்பட்ட கதையே அது. 

ஒரு வேளை , தேர்க்காலில் சிக்கியது எருமைக் கன்றுக் குட்டியாக இருந்திருந்தால், நீதியே மாறிப் போயிருக்கும்.